Халкъымызнынъ озь акъ-укъуклары ве онъа нисбетен адалет тикленильмеси ичюн курешнинъ энъ буюк ве тесирли темсиллерине чевирильген Муса Мамутнынъ (1931–1978) элякъ олгъан куню, 28-июнни, эр сене, о яткъан къабристанда дуа иле къайд этмеси энди аньанедир.

«Эвель биз бу эм кедерли, эм шерефли йылдёнюм мунасебетинен эр беш йылда дуа отькерген олсакъ, 2023-тен башлап, эр сене топланамыз», — деди тедбирнинъ тешеббюсчиси ве тешкилятчысы, озю Къырымда энди ярым асыр яшагъан, белли ерли джемаатчы, 82 яшлы Нариман агъа Абдураманов.

Мерасим чокъ тешвикъат этильмей, чюнки мезарлыкъта япылгъан навес астына ве масалар башы отурмагъа – 30-35 инсандан зияде сыгъмай. Бу сефер якъарлыкъ меселеси де къошулды.

Дуаны, джумле къаиделер боюнджа эм де ерли анълатувларнен, яхшы сеснен, Акъмесджит дживарындаки Чоюнча (Урожайное) коюнден молла Нариман агъа Бекиров алып барды.

Дуадан сонъ бир сыра чыкъышлар олды, о замангъа аит базы вакъиалар хатырланды. 48 йыл эвельси япылгъан къараманлыкънынъ бугуньдеки эмиети неден ибарет олгъаны айрыджа къайд этильди.

Муса Мамутнынъ мезары янында кутьлевий ресимге тюшильди. Онынъ ве янында яткъан Миллий арекетимизнинъ шанлы эрбаплары ве иштиракчмлери – Бекир Османов, Энвер Аблаев, Осман Османов эм де дигерлерининъ рухуна дуа багъышланды.

Н. Абдураманов газетимиз вастасынен, озюнинъ ве джемаат адындан молла Н. Бекировгъа, тешкилий меселелерде онъа салмакълыджа ярдым эткен, эр бир кельгенге озь къолунен япкъан миллий сувенирлер багъышлагъан, Богъурча (Каменка) къасабасындан джемаатчы Рустем Музафаровгъа тешеккюр бильдирди.

Тедбирде Муса Мамутнынъ акърабалары, шу джумледен, торунлары ве, атта, торунчеси иштирак эттилер. Шу мезарлыкъта онынъ омюр аркъадашы Зекие апте, огълу Юнус, къызы Диляра раатлыкъ корьмектелер. Алла Таалянинъ рахметинде олсунлар. Акъмесджитте яшагъан кичик къызы Сабрие ханымгъа Юдже Раббимиз сагълыкъ берсин.

Къырым, газета, 2026 с. 1 — июнь, № 25 (2409)