Акъмесджитнинъ Акъмечеть къасабасында якъында къурулгъан янъы мектеп бу сене март айында ресмий джедвельге алынды. Онъа 45-нджи сан берильди ве янъы окъув йылына сыныфларны толдурмакъ ичюн ана-бабалардан аризалар топланмагъа башланды.

Бунынънен берабер, табиий алда, мектепке ады къоймакъ меселеси чыкъты. Шу микрорайонда яшагъан эали адындан шеэр шурасына, онынъ реиси ве депутатларгъа мектюп ёлланылды.

Ерли джемаат бунъа – корюмли миллий эрбап, сиясетчи, видждан мабюси (узник совести – бу анъламлар мектюпте, эбет, кетирильмей), мувафакъиетли алим-шаркъшынас Юрий (Юсуф) Бекир огълу Османовны (1941–1993) ляйыкъ корелер ве теклиф этелер.

Бу теклифнен разы олмамакъ мумкюн дегиль – чокъ дегерли намзет. Мектюпте онынъ терджимеиалы, хызметлери кетириле. Лякин мураджаат мевзусына базы арткъач ве кечмиш вазиетнен багълы янълыш ве зарарлы къыймет кесювлер къарыша.

Белли ки, бойле весикъаларнынъ бир, я да бир къач муэллифи ола. Дигерлери, яни чокълукъ, чешит себеплернен метнни окъумаздан, садедже, имзалайлар. Нени корьмедилер имзалайыджылар? Бир къач мисаль.

1. «Юрий Бекирович категорически был против самозахватов, беззакония и коррупции, панибратства и кумовства лжевластия».

Мында бир сырагъа мана-маиет ве маневий-эдеп джеэтинден баягъы фаркълы анъламлар тизильген. «Коррупция», дейик – къатты, агъыр джинает, «панибратство» — адий тербиесизлик.

«Самозахват» — анавы «лжевласти»нинъ лексикасындан, бизим сёзлюкке «самовозврат» кирди ве о, «беззакония»ларгъа джевап эди.

Мектюпни азырлагъан муэллиф бильсе керек: ватандашларымыз 300-ге якъын къургъан ве топлу яшагъан янъы къасабаларынынъ астындаки топракълардан не къадары акимиет тарафындан гонъюль ве самимий истек сыфатында айырылды – ярысына бармайдыр, хусусан, шеэрлерде.

Бир къач йыл кечерек олар эписи къанунлаштырылгъаны ве абаданлаштырылгъаны – самовозврат арекети не дереджеде адалетли ве акълы олгъаныны яхшы косьтере. Асылында, бу факт мектепке Ю. Османовнынъ адыны бермек меселесине насыл алякъа барлыгъы озю шубели.

2. «Величайший по значимости в истории Крыма взнос Юрия Бекировича Османова. Жители Крыма благодаря инициативе Ю. Б. Османова в общественно-политической деятельности государственного строительства стали жить не просто в одной из областей Украинской ССР как раньше 1989-1991 годов, а в государстве Автономной Республике Крым».

Быламыкъ-джумле: эм услюп (стиль), эм де фактология джеэтинден пек къарышыкъ. АРК девлет дегиль, укъукъий джеэттен асылында анълашылмагъа бир къурум эди. Юрий (Юсуф) агъа – о, арзу эткен миллий мухтариет ве «АРК» арасы ернен кок киби олгъаныны пек яхшы анълай эди. Бу мевзу пек кениш, лякин анълайышлы – девам этмейик.

3. «Он же добился для многих работников Комитета и УКСа Рескомнаца выделения земельных участков в этом же микрорайоне».

Я не себептен, атта «работник»лерге, яни «чиновник»лерге шеэр акимиети арса (участок) айырмады да – шахсий мескен къурмакъ топракъны Ю. Османовгъа «добиваться» этмеге керек олды? Я адий инсанлар не япмакъ керек эди – он йылларнен, эбедий беклемек? Я да сюргюн улькелерге кери къайтмакъ?

Ве кене де: мектепке миллий эрбабымызнынъ ады берильмесине мезкюр «делиллер»нинъ не алякъасы бар? Олар, бекленильген, истенильген мусбет къарар къабул этильмесине чалышалармы, аджеба?..

Иншалла, Акъмечит къасабасы джемаатчылыгъынынъ риджасы ерине келир ве Исмаил Гаспринский, Эшреф Шемьи-заде, Алиме Абденнанова, Сеитнафе Сеитвелиев эм де мектеплеримизге берильген дигер буюк шахысларымызнынъ адларына Юрий Бекировнынъда шанлы ады къошулыр. Беклеймиз.

Б. АДЖДЖЫ. Къырым, газета, 2026 с. 3 -июнь, № 21 (2408)