Нидже шаир алтын кузь мевсиминден ильхам алып, озь тесирли, фельсефий сатырларыны тизген, озь окъуйыджыларынынъ юрек теллерини сызлаткъандыр. Алтын кузнинъ кунеши де йылтырай, де тюшюнджели, эеджанландыра… Бир кунь биз оны авучымызда сакъламакъ истедик…  Лирик муиттен, достане субеттен гонъюльдже исинмек истедик. Иджадий тедбиримизни кечирмек ичюн, миллий эшьяларымызнынъ такъымыны топлагъан Айдер Халиловнынъ элинден мейдангъа кетирильген, чебер къолларнен донатылгъан азбарчыкъкъа малик, озь одаларында Къырымнынъ эски тюсюни ве земаневий тасвир санатыны такъдим эткен «Zolaman» музейи бизге насип олды. Айдер агъанынъ музейинде мусафир олып, «Fikirdeşim» иджадий бирлешменинъ тешеббюсинен «Авучымда кузь кунеши…» адында шиирий-музыкалы тедбирни кечирмеге къарар алдыкъ.

Октябрьнинъ 27-синде тедбиримизни отькердик. Этрафымыздаки, халкъымызнынъ буюк истидатлары рессам Асан Барашнынъ озьгюн, фельсефий ресимлери эм де, рафчыкъларда тургъан, кираметчилер Шамиль Ильясов ве Абдюль Сеит-Аметовнынъ эсерлери, шубесиз, тедбиримизнинъ муитине айрыджа бир кейфиетлер къоштылар ве теэссуратларны даа да кучьлештирдилер. Керчек сёйлесек, бизлер бойле корюшювлеримиз (бельки, шимди сийрекче кечирильгени себебиндендир), дерсинъ, бири-бирини сагъынгъан достларнынъ расткелишине чевирилип кеткенини эследик. Бу сефер де ойле олды. Микрофон огюне чыкъып, Майе Сафет, Эмине Усеин, Сейран Ибраим, Эльмаз Бахшыш, Динара Аджи ве Сеяре Кокче озь шиирлерини окъудылар. Эр бир шаир озь услюбинде, озь ритминде, озюне хас гъайрети иле залны тодургъан динълейиджи мусафирлернен озь дуйгъу-фикирлерини пайлашты. Сейран бей, озь чыкъышыны башламаздан эвель, белли рессам ве шаир Рустем Эминовтан селям олгъан, мезкюр тедбирге багъышлангъан, шиирини окъуды.

Бу корюшювни учь дал-фидан бойлу, бульбюль сесли, дюльбер яш йырджы ханымлар – Фериде Асанова, Фатма Джаппар ве Эмине Мустафаева яраштырдылар. Оларнынъ чыкъышлары эски девирлерге алып барып, бугуньден келеджекке, шырныкълы бир озенчик киби, узанды. Йырджыларымыз эм айры-айры чыкъыш япты, эм де учевлешип, йырлап, мусафирлеримизнинъ юрек теллерини тепреттилер.

Эписи булар – музейде такъдим олунгъан санат эсерлери, къынтавлы азбарчыкъ, назмиет ве тюркюлер кузьнинъ алтын мевсиминен пек уйгъунлаштылар. Тедбирден сонъра, азбарчыкъта, адет олгъан къавелер де ичильди, лакъырды-къонушув юзь берди. Авучымыздаки кунеш бу кузьнинъ сыджакъ ве айдын бир хатырасына чевириледжек…

Иджадий корюшювни кечирмекте гъаевий къолтутув косьтерген Avdet газетасы, ярдым эткен «ЭРА» фотостудиясы, мусафирчен «Zolaman» музейи, эписи иштиракчы ве сейирджилеримизге «Fikirdeşim» иджадий бирлешменинъ адындан самимий тешеккюрлер бильдиремиз.

«Fikirdeşim»