Миллий давамыз сафдаки ишанчлы аркъадашымыз, фааль джемаатчы, алидженап инсан, садыкъ баба ве мераметли къартбаба

Энвер Аблямит огълу Алядин

10-майыс сабасында, апансындан, кениш инфаркт дарбеси нетиджесинде, аджеле ярдым экимлери кельгениндже, бу дюньямызны терк этти.

О, 1963 сенеси, Озьбекистаннынъ Сыр-Дарья виляетининъ Баяут къасабасында, Аблямит агъа ве, энди рахметли, Зекие аптенинъ чокъбалалы къорантасында догъулды.

Мектеп битиргенинен, Алмазар кой ходжалыгъы техникумында, сонъра Алма-Ата Зооветеринария институтында тасиль алды — 1986 с. бу саада энди баягъы теджрибели мутехассыс олды. 1987 с. эвленди, омюр аркъадашы Эдие ханымнен (энди о да рахметли) алты эвляткъа мераметли ана-баба олдылар. Бешини осьтюрдилер, оларгъа яхшы тасиль ве догъру тербие бердилер.

1989 с. яш къоранта Джурчи (Первомай) районынынъ Тонгъулчакъ (Гришино) коюнде эв алып, ерлешти. Зенааты боюнджа ишке кирди, озюни эр тарафтан дегерли шахс олгъаныны косьтерди, урьмет къазанды, танылды.

Энвер бей джемаат ишлерине де чокъ фааль тарзда къошулды. Койде ерли миллий идаре къурумынынъ реиси, регионда къурумымызнынъ азасы олды. Акъмесджитте, миллий акъларымыз тикленмеси огърунда отькерильген чешит сиясий тедбирлерде фааль иштирак этти.
Багъчасарай районындаки бабасы догъулгъан ери — Янджу (Путиловка) гъайрыдан тикленильмеси ве джанланмасына, къадимий джамиси къайтарылмасына, ресмийлештирильмесине, тамирленмесине ве гъайрыдан чалышмасына Энвер бей де озь салмакълы иссесини къошты.
Чокъ йыллардан берли ве яхшы севиеде отькерильген койдешлер корюшювлернинъ тешеббюсчилери, тешкилятчылары ве алып барыджыларындан бири олды. Онынъ фааллигини бегенмелер де олды: 2016 сенеси полислер эвлеринде тинтюв кечирдилер.

Энвер бей хатырамызда миллетсевер, халкъынынъ такъдири ве келеджегини къайгъыргъан, алчакъгонъюлли, кулерюзлю, умютчан, садыкъ ве мераметли аркъадаш киби ер аладжакътыр.

Энвер Алядин вефат эткени мунасебетинен онынъ бабасы — учь Эмек шурасы орденлерининъ саиби, 92 яшлы Аблямит агъамызгъа, балалары Вели, Веби, Реяне, Мавиле, Сакинеге, келин-киевлерине ве джумле сой-акърабаларына терен тазие бильдиремиз эм де сабырлар иле баш сагълыгъы тилеймиз.

Миллий Къурултай мебусларынынъ бир гурухы, достлары, сафдашлары.