Миллий арекетимизнинъ фааль иштиракчиси, 2000-джи сенелери Акъ-Мечит (Черномор) районынынъ Ярылгъач (Межводное) ерли миллий идаре къурумынынъ реиси, 2012 сенесинден сонъки вакъыткъадже шу районынынъ региональ миллий идаре къурумынынъ реиси, IV Миллий Къурултайнынъ мебусы

Шевкет Сервер огълу Смаилов

11-майыста юрек эксиклигинден (зайыфлыгъындан) кечинди.

Шевкет бей 1963 сенеси Озьбекистан, Фергъана виляети, Алты-Арыкъ районынынъ Вановск къасабасында догъулды. 1973 с. ана-бабасынен, «вербовка» иле Къырымгъа авдет олды.

Къоранта башта Джурчи (Первомай) районынынъ Айбар (Войково) къасабасында ерлешти. Сонъра (1988) олар Акъ-Мечитнинъ Къарлав (Снежное) коюне кочелер. 1995 сенесинден берли Шевкет бей озь къорантасынен Ярылгъачта яшады. Мында онынъ тешкилятчылыгъы саесинде джами къурулды, 1944 с. сюргюнлиги къурбанларынынъ хатырасына мемориал абиде тикленильди. Районда да бир сыра дигер эмиетли ве нетиджели джемаат ишлери япылды. Шевкет бейни бильгенлер хатырасында о, алчакъгонъюль, беджерикли, фааль тешеббюсчи, ватанпервер инсан оларакъ къалды ве ойле де яшайджакътыр.

Шевкет Смаилов апансыздан вефат эткени мунасебетинен онынъ къорантасына, джумле якъынларына терен тазие бильдирип, баш сагълыгъы, сабырлар тилеймиз.

Мерхум Алла Таалянынъ рахметинде олсун.

Миллий Къурултай мебусларнынъ бир гурухы, достлары, сафдашлары.