Медениетимиз, санатымыз даа бир истидатлы, ватанпервер, алчакъгонюлли эрбабымызны джойды. Бу куньлерде белли джемаатчы

Сеит-Абла МАМУТОВны
сонъки ёлуна озгърадыкъ.

О, сюргюликте — Таджикистанда, 1959 сенеси дюньягъа кельди. Къоранталарында, ондан гъайры, учь татасы олгъан: Раиме, Селиме ве Мерзие. Олар муаббет яшап, эр иште бири-бирине къолтуткъанлар.

Къырымгъа кутьлевий авдет йыллары Сеитабла ве эки татасы да Ленинабаддан къайттылар. Дигер ватандашлары сырасында, олар да акълары ичюн курешмеге, эв къурмагъа, яшайыларыны абаданлаштырмагъа тырыштылар.
Сеит-Абланынъ эдждатлары Отарчыкъ ве Керменчиктендир. Урие Керменчикли ве Сабрие Эреджепова акъкъында о, алаларым, дей ве бу сойлукънен пек гъурурлана тургъан.

Озю къуруджылыкъ интитутыны битирсе де, гонълю театрге багълы ола. Меилине ёл берип, Къазахыстаннынъ Шевченко шеэринде (шимди Актау) аматор (авескяр) театринде сана инджеликлерини огренмеге башлай ве баягъы енъишлерге ирише.

1990-нджы сенелери о, Москвада Театр санаты девлет институты (ГИТИС) янында махсус миллий театрлернинъ бедиий реберлери ичюн тешкиль этильген режиссёр курсларыны битире. Устасы — белли театр эрбабы Марк Розовский эди.
Сеит-Абла, театрны джандан севе, дикъкъатлы сейирджи ве сагълам тенкъитчи эди. Онынъ бу саада бильгиси гъает кениш олып, чокъ меселелерде меслеатчылыкъ япты. Лякин миллий театримизде чалышмакъ онъа къысмет олмады.

Сеит-Абла джемаат ишлеринен фааль огърашты. Онынъ реберлигинде «Дияр» джемаат тешкиляты мейдангъа кетирильди. О, атта, миллий театрни тешкиль этмекте муэллиф акъкъыны къазанды ве балалар, генчлер театрлерини яратмакъ арзусынен яшай эди. О, той чалгъыджылары ильк фестивали отькерильмесинде фааль иштирак этти.
Сонъки йыллары о, бири-бири артындан учь татасындан айырылды, озюнинъ де сагълыгъы баягъы зайыфлашкъан эди. Достлары оны алидженап, акъыллы, инсаниетли, терен бильгили ве самимий инсан киби хатырлайджакълар. Алланынъ рахметинде олсун.

Джиени Майеге, дигер сой-акърабаларына терен тазиемизни бильдире ве баш сагълыгъы тилеймиз.

Достлары ве зенаатдашлары адындан Рефат Сеит-Аблаев.